上星期，偶然認識一位figure制作方面o既同好。佢話原來我一直有用o既物料supersculpey出o左隻灰版，質感比較硬身，幾好雕。我自己覺得最正o既係，佢無舊一款果種半透明感，即係唔使噴灰都可以即刻睇到哂o的瘕疵，可以執到靚哂先去焗。唔會焗完先發現問題，再執就好煩。
跟住見位新朋友都有用牙醫刀雕o野。好幾年前何家超已經介紹我用牙醫刀雕公仔，果陣見一把刀三、四十蚊，當時自己雕公仔未有咁高要求，手上幾把木刀應該應付到。而家見人用，自己突然又想搵套番黎試下，所以搵日走出去買哩兩種用品。
去到某公司醫療用品部，見o的牙醫刀放響飾櫃入面，無得拎上手揀，唯有哄埋去睇。唔知係唔係因為見到利器，個樣有少少興奮o既關係，我覺得阿店員姐姐眼神有o的異樣……。加上我買哩o的o野，又唔肯定邊把o岩用，逐把刀諗下o岩唔o岩使，就咁哄埋去，個樣有少少興奮咁睇o左十幾分鐘都無出過聲，店員姐姐有o的驚都係正常o既，真係唔好意思…….。
唔記得講，尋晚順便買o左。
今期，已經幾乎完全同「繪戰」哩個題材無關……..。完全變成一個神怪故事。基本上當初唔使用哩個題材都得,而家真係浪費o左。不過除o左哩一點，本書本身係好睇o既，劇情推展都夠吸引，個將軍好型！！只係我自己對神怪題材興趣唔大，不過都會繼續追第三期。
女主角個名好有趣，「冰婷」=「painting」？唔知我有無自作聰明……。
今日同學聚會，同學K終於自己正式掛牌，做o左中醫師！
幾條友上佢診所參觀一下，第一次入診所而唔係睇病……。自己從來未睇過中醫，同學m見有o的鼻水，梗係乘機睇睇佢啦，阿k醫師即刻話：「敢唔敢試下針灸丫~~~？」哇！佢真係拎幾支堅o野出黎，隨即幫阿m插到o左幾支針，難得阿m又氣定神閒咁俾佢插！廿分鐘之後，阿m又真係即時收哂o的鼻水喎~~~~！
跟住阿同學W又唔執輸，講哂o的隱疾出黎睇下有冇得救……。我本來都想睇下。不過又見自己無乜病痛，無謂麻煩人啦，話哂打開門口做生意。
上星期番o左大陸做o野，一連五日。
平時出埠，自己部門最少都有三個人，今次得我一個，仲要做埋其他人o既角色，咁大鑊都係第一次。果幾日其實心情唔多好，因為經驗上o既問題，經常俾人插！第一次自己一個人揹哂件事，顧慮多o左，壓力自然又大o左。不過哩次經驗對我幫助好大，平時工作上面無乜留意o既o野，都要一一面對番哂，技巧上面焗住跨前o左一步。自己諗深一層，自己有o野做得唔夠好，俾人插係應份o既，插完我又學多o左樣o野，何樂而不為？經此一役，而家完全有哂信心應付同一個處境。哩一轉有得食有得玩，有得俾人插，插完又有進步，真係賺哂~~！下次預埋我呀唔該~~~~~！
睇睇哩轉搞咩先。深圳書城，大！不過可惜無時間行，搵日一定要去多次。
跟公司出去做o野，最大好處係“食”一定好，最緊要唔使自己俾錢。
因為幾日心情都麻麻，好少影相。去到最後一日臨收工輕鬆哂，上面係世界之窗，一個同香港廸廸尼一樣，自己絕對無諗過會買票入去o既地方。
星期日，同銀河兄弟兩大台柱上o左廣州。主要係耐無上去行，同埋為o左睇個同人展覽。上次上去睇同人展覽已經係02年，果陣「冬日」o岩o岩跑出，前途一片光明，估唔到幾年貨仔……。
今次上去只係睇o左一個比較小型o既展覽，無乜期望，場地去番我2000年有參與過o既中山圖書館，但係一個我認識o既廣州朋友都撞唔番。
我覺得今次見到o既作品方向同水準，都同香港o既差唔多，印刷質素都追番上黎。連價錢都追番上黎…..。廣州廿幾三十蚊一本漫畫…….。各方面都比上次見o既好好多！可能資訊發達真係影響好大。
其實入場都係停留o左廿分鐘樓下，跟住大半日我o地都係去行街，睇下o的年輕人生態咁。同香港一樣，周街都係PSP！周街都係三、四個人圍埋團戰MHP2G。龍的傳人愛屠龍…………。
2000年果次，廣州朋友介紹o左我去一個佢o地平時買漫畫o既商場，當時我見到一個破破爛爛商場，今次再去，變o左潮流集中地，頂樓仲變埋ACG特區，見到佢o的「蛋」同figure舖，都幾追得上o的貨。我有兩秒以為自己去o左秋葉原…..。
睇到「電腦線圈」中間，睇到「生鬚」果集。講電腦病毒發展出文化、宗教，戰爭同核彈，笑到反肚……….。其實類似o既橋段，以前叮噹成日用啦~~，跟住果集長頸龍完全就係電腦版o既「大雄的恐龍」。分別係「電腦線圈」會令人覺得科技發展落去，事件係完全成立o既。
S.I.C跟住會出「電王」！「幪超」系列其中一隻公認樣衰o既傑作。S.I.C化之後，我唯一一個反應就係──「買」！其實本來個造形我自己覺得ok o既。而家除o左型之外都唔知講咩好。
成日都話，屋企可能風水好，經常都有小動物經過時，停留休息一下。之前無一部相機zoom得，所以無乜影到相，今次部新機唔使行埋去都影到。
成隻白鴿咁大，叫聲仲“咕~~”“咕~~”咁聲，幾得意。
早兩日走去睇埋“IRON MAN”，好欣賞男主角「出事」前果種荒淫o既生活…….。成套戲開開心心咁咪幾好囉~~~~。只係動作場面少o左o的。尾場諗住會單拖鬧市隻「秋」鐵甲軍團，點知都只係例牌幾味…..，少少失望。期待下一集。
(0)
