今日同學聚會，同學K終於自己正式掛牌，做o左中醫師！
幾條友上佢診所參觀一下，第一次入診所而唔係睇病……。自己從來未睇過中醫，同學m見有o的鼻水，梗係乘機睇睇佢啦，阿k醫師即刻話：「敢唔敢試下針灸丫~~~？」哇！佢真係拎幾支堅o野出黎，隨即幫阿m插到o左幾支針，難得阿m又氣定神閒咁俾佢插！廿分鐘之後，阿m又真係即時收哂o的鼻水喎~~~~！
跟住阿同學W又唔執輸，講哂o的隱疾出黎睇下有冇得救……。我本來都想睇下。不過又見自己無乜病痛，無謂麻煩人啦，話哂打開門口做生意。
睇到「電腦線圈」中間，睇到「生鬚」果集。講電腦病毒發展出文化、宗教，戰爭同核彈，笑到反肚……….。其實類似o既橋段，以前叮噹成日用啦~~，跟住果集長頸龍完全就係電腦版o既「大雄的恐龍」。分別係「電腦線圈」會令人覺得科技發展落去，事件係完全成立o既。
S.I.C跟住會出「電王」！「幪超」系列其中一隻公認樣衰o既傑作。S.I.C化之後，我唯一一個反應就係──「買」！其實本來個造形我自己覺得ok o既。而家除o左型之外都唔知講咩好。
成日都話，屋企可能風水好，經常都有小動物經過時，停留休息一下。之前無一部相機zoom得，所以無乜影到相，今次部新機唔使行埋去都影到。
成隻白鴿咁大，叫聲仲“咕~~”“咕~~”咁聲，幾得意。
早兩日走去睇埋“IRON MAN”，好欣賞男主角「出事」前果種荒淫o既生活…….。成套戲開開心心咁咪幾好囉~~~~。只係動作場面少o左o的。尾場諗住會單拖鬧市隻「秋」鐵甲軍團，點知都只係例牌幾味…..，少少失望。期待下一集。
MHP2G開到「崩龍」，但係HR9限定，公司得我一個HR9，即係無人陪我打……。
電腦線圈老友一致推介，一次過睇o左三集，勁！當初仲俾佢七十年代畫風嚇窒o左，點知原來係傑作！我覺得係一套「有可能發展成事實o既《叮噹》！」好鍾意眼鏡婆婆果種「雜貨舖電子驅魔人」o既身份，令我諗起多年前大友克洋套《老人Z》！同埋欣賞佢果種生活化o既虛疑真實，高科技玩具加老街探險。題材其實唔算新鮮，但係配合懸疑手法，令到事情變得好有趣。後面應該可以發展到好好玩。
套稿改完男主角果場分鏡，起緊鉛筆。下一場就係我等o左十年o既男女主角相認喇~~~~。
最近工作好繁重，好多事想坐底寫兩句都無時間。首先，邪惡集團「銀河兄弟」秘密基地秘密移動，成立極東總部，向征服地球跨進o左一大步！堆滿o左邪惡儀器o既混亂狀態…….聽講而家已經整頓好哂，搵日上去開支酒慶祝下先。
之前聽一個成日著涼鞋，腳趾灰灰黑黑，手甲經常剪唔貼兼有黑邊o既人講，話原來佢係有潔癖…………
早幾日去某片場做o野，見到上面哩件「道具」，應該係真飛機o既殘骸，即刻影番幾幅資料。
一直覺得部舊相機唔夠用，無手動對焦影figure好辛苦。而家舊電死埋，更加急住要換。紅假果幾日，我細佬去旅行，老豆老母又去另外一個行程。屋企唯一一部健全o既傻瓜機俾老豆拎去用。細佬就同我講「橫豎你都換機，不如你買部新相機借俾我用啦！」。然後每隔幾日就打個電話sell哩個「概念」一次……
話說響我少年時代，讀緊一個攝影課程，想向老豆拎三千銀買部相機黎用，我細佬極力反對之下，結果之後六年之內我都無相機用，兼且到今時今日，我都覺得當時因此學唔成攝影，係一大遺憾。
佢而家諗得出哩種「我去娶個老婆返黎，但係俾你用先。」o既妙計，又夠膽好意思講得出口o既，都確係幾無得頂~~~！但係更神奇o既係：我早兩日出去旺角買o左部相機，借o左俾佢…….
尋日收到通知，今屆漫畫節「動漫ArtIdol」開始接受報名。
早o係舊年八月，我已經諗到一個人物，打算今年造出黎。尋日見到個通知，諗住第一時間報名，但係原來今屆有限制題材，大會想配合奧運….。我本身對運動類題材一直無興趣，一時間唔敢肯定交得出水準，而且先前想造o既人物又唔造得，所以猶豫o左一日。今朝仲諗緊好唔好暫停一屆，今年專心畫稿？夜晚返黎，o岩o岩開機收到通知，原來已經額滿！即刻鬆o左口氣~~~~
(0)
