「心裡有鬼」只不過係一個比喻，一個比喻視覺化之後可以玩到咁多o野出黎，確係勁！不過類似o既手法，舞台劇其實都幾常見，電影就比較少。反而早幾年有套漫畫《異能者》都有將人o既本質視覺化o既橋段。不過《異能者》可以玩得超現實o的，心理形象千奇百怪。所以成日話學漫畫就要睇多o的共他唔同媒介o既創作，觸類旁通丫嘛。
套戲其實都幾精彩，開頭大半個鐘尿急，竟然搵唔到空隙去廁所~~~有趣位都幾多，幾鍾意「殺o左人，搵唔番自己」哩下。同埋老婆就係自己心入面隻鬼哩下幾幽默。個人覺得反派果邊「七隻鬼」描寫空間唔夠，可以日常生活玩多o的心理矛盾，戲量應該同主角差唔多先夠玩。而家好似無必要有「七隻鬼」咁多。同埋哩個心理應該好複雜o既角色如果搵吳鎮宇做，效果可能會好好多。
點解暗殺會失敗？點解王佳芝關鍵時刻轉呔？我覺得問題反而係因為鄘裕民無做特工o既潛質。特工基本能力係玩弄心理，為求目的，用盡身邊o既人同物。
王佳芝崩潰，係因為從來未試過有男人真正對佢好。自己只不過係臨時拉夫愛國份子，心靈又空虛，哩個結果理所當然。老吳仲走去同佢講埋咩忠於黨、忠於國家實在搞笑。佢想「忠於」o既只係一個男人。鄘裕民無理由睇唔出王佳芝當初對自己有意。佢就係唔夠狠，無對佢預先「調教」一下，等佢對自己「忠誠」，結果就完全唔同啦！臨尾先黎「出手」果一下，實在太難睇喇~~~~~不過女性作者通常都鍾意寫到男人咁「不濟」。
對於鄘裕民哩個結局，只能夠講一句──抵死！
尋日一晚馬拉松煲o左四套戲。《神經俠侶》《再造人之戀》《老港正傳》《跟蹤》跟住成晚訓唔著，o的劇情左右上下反轉咁穿插o左成晚……印象最深都係《神經俠侶》o既吳鎮宇，基本上佢先係主角，當然陳奕迅都好正。《老港正傳》同《跟蹤》都係個驚喜呀。《再造人之戀》就淨係得個「驚」！點解呀~~~~~~~我心目中韓國第一《原罪犯》o既導演，點解會拍套咁o野出黎…………..？
尋日山長水遠走過筲箕灣同屋企人飲茶，諗住順便去文娛中心拎電影節本小冊子。行均哂都無，派哂！咁焗住過電影資料館走一轉。拎完，順便行個圈。咁o岩有個講電影場景設計o既展覽《驛動空間》，近排幾著重研究場景設計，因為寫緊果套要諗大量場景，o岩o岩仲買o左《惡童》本場景美術。咦，學到o野喎~~~仲睇到黃仁逵講解佢設計意念添。好懷念80年代o的港產片呀~~~~~~~一年都去唔到一次電影資料館，原來展期最後係到今日，咁o岩撞得到都算係緣份呀。
尋晚走去睇《放‧逐》。近排比較忙，有段時間無入過戲院，不過哩一年都有支持杜sir作品，點都要抽空入場學o野。
前半段張力好犀利，導演功力好「出」，亦都係我最學到o野o既部份。好鍾意杜sir果種「做兄弟，唔使講o野~~」果份情懷。敵對形勢又嘻嘻哈哈一齊食餐飯，上次《大事件》已經用過，今次情況少少唔同，不過更加有效。話就延續《鎗火》風格，我覺得出黎近似西部片多o的。尤其後半段走o左去個石礦場，仲有尾場酒店鎗戰。不過個人仍然係鍾意《鎗火》多o的，始終整體結構統一o的，又係香港發生，感覺好o的。
自己都想嘗試寫下哩種靜態又張力咁強o既場面，不過以目前o既「戲路」同功力就…….
早兩日上o左去銀河映像(今次唔係銀河兄弟！)，做o左個杜sir o既訪問。聽佢講o左好多佢對黑澤明電影o既睇法，勁！原來佢電影風格同黑澤明有千絲萬縷o既關係。雖然我係戲劇狂，但係黑澤明o既戲竟然睇得唔多，屋企買o左幾套碟都仲未睇哂，惡補正係時候喇~~~~睇睇杜sir個兩層樓咁高o既書架，咦，漫畫都唔少喎~~~~仲有火鳳燎原添！唔知佢有冇興趣拍電影版呢？
早兩日走去睇《魔盜王》第二集，本來都係為o左睇《one piece》果種半魚人同海王類，哩方面都不負所望，仲加埋有場玩埋二刀流添。不過就…..根本就應該叫做《魔盜王2上集》囉！睇到最尾，係無一件事係有解決到…..感覺就似睇o左半套戲就俾人趕番出黎咁樣……
不過節奏同笑位都有水準保證，都學到o的o野o既。另外最近仲有留意o既梗係《死亡筆記》啦，不過就，日本片始終好有戒心。加上哩套要改篇又好有難度，再加上段片頭又唔太吸引，都係睇下口碑先囉~~~~~
(0)
