如果一班「落場跑」o既男仔，每論冠亞季軍都一樣有獎，咁幾好呢~~~~，因為每場「賽跑」，我多數都得到高名次──亞軍！
可惜現實，感情，並唔係一場競賽。亞軍得主，獎品永遠都係可以同冠軍同台，睇住冠軍高高興興拎走個獎……..以後連想望多個獎一眼，都有避忌。點解輸人零點零一秒，遭遇已經係天國與地獄？
不過，今次唔同喇~~我連起跑鎗聲都聽唔到，原來對手一早已經‧過‧o左‧終‧點……喂，裁判！唔好意思，現實世界就係偷步果個贏o架喇！
其實我只係想知道，究竟我仲要落場再跑幾多次？……….
終於扮完一日G4，幫溫少俠完成o左佢o既大事。
第一次著足一日西裝，cosplay o左一日sunny哥。出得到踢擊，條褲都仲無爆呔，即刻醒神哂。照鏡睇睇自己個look，又唔係想像中咁差，都ok見得人喎~~~原來我個樣仲「有得救」o架~~~~！
朝早幫人接新娘，都係考下o的無謂o野，喂！點解唔考掌上壓呀~~~~~！後生果陣一分鐘八十下o既身手都無機會發揮，好唔甘心呀！
總括經驗，搞壇咁o野真係好辛苦，見阿少俠搞到身水身汗，差o的吞劍同跳火圈都玩齊。做兄弟o既都唔好過，最慘要招呼o的完全唔識o既男女家親戚，走黎走去又搬又抬之後，又要keep得住個《鎗火》look。
好在後尾響酒樓終於見番哂中學時代o既黃金組合！坐番埋一檯喇！只可惜強少都係黎唔到。希望跟住過年可以約得齊人啦。
班老友個個循例走埋黎問幾時輪到我，哩句o野你o地問o架咩！？應該係由我‧問‧個‧天……
尋日，朝早去o左觀禮。同個新娘o既關係都幾複雜，佢向佢o的朋友介紹我果陣，係咁樣講o既：「學長+大佬個同班同學+街坊+同事」一去到現場，以我o既工作性質，梗係第一時間有人塞o左部攝錄機俾我…放假都要做….算啦，見係佢o者。既然新娘而家係我唔同部門o既同事，咁跟住就一定會走o左一o的我完全唔識，但係理論上又算係我同事o既人出黎，拍完o野我都諗住番屋企寫下劇本，阿同事又無端端扯埋我去飲茶，又無端端又幾好傾喎~~~~~都幾開心。
跟住，夜晚轉場去o左溫少俠個「兄弟」作戰會議。撞番o的廿年老友，高興！又另外識多o左一班人，一日之內記咁多人名真係搞唔掂。
最後番到屋企，冇人，原來兩老去o左飲！搞乜全日都同o的喜慶事有關咁邪呢？都好丫~~~o的「師傅」話我今年要去多o的喜慶事，係呀，我真係極之需要「沖喜」。
下星期係舊同學溫少俠大婚，識o左廿年，唔會淨係去飲咁簡單。
今次係少有唔叫我幫手拍o野，淨係做兄弟，咁就無借口唔著老西…所以上兩星期造o左第一套西裝，著上身，超出我意料之外，竟然唔似部長喎~~~~仲有幾分似我個角色sunny哥添！得閒著上身投入下角色都好呀！「方法演技」丫嘛~~~但係我已經唔記得點樣打呔，唔通要新郎幫我打番轉頭？另外見個眼鏡殘殘地，頭先仲走去配過副眼鏡添，真係俾哂面。今次我就重傷不治喇…..
(0)
