唔記得講，尋晚順便買o左。
今期，已經幾乎完全同「繪戰」哩個題材無關……..。完全變成一個神怪故事。基本上當初唔使用哩個題材都得,而家真係浪費o左。不過除o左哩一點，本書本身係好睇o既，劇情推展都夠吸引，個將軍好型！！只係我自己對神怪題材興趣唔大，不過都會繼續追第三期。
女主角個名好有趣，「冰婷」=「painting」？唔知我有無自作聰明……。
星期日，同銀河兄弟兩大台柱上o左廣州。主要係耐無上去行，同埋為o左睇個同人展覽。上次上去睇同人展覽已經係02年，果陣「冬日」o岩o岩跑出，前途一片光明，估唔到幾年貨仔……。
今次上去只係睇o左一個比較小型o既展覽，無乜期望，場地去番我2000年有參與過o既中山圖書館，但係一個我認識o既廣州朋友都撞唔番。
我覺得今次見到o既作品方向同水準，都同香港o既差唔多，印刷質素都追番上黎。連價錢都追番上黎…..。廣州廿幾三十蚊一本漫畫…….。各方面都比上次見o既好好多！可能資訊發達真係影響好大。
其實入場都係停留o左廿分鐘樓下，跟住大半日我o地都係去行街，睇下o的年輕人生態咁。同香港一樣，周街都係PSP！周街都係三、四個人圍埋團戰MHP2G。龍的傳人愛屠龍…………。
2000年果次，廣州朋友介紹o左我去一個佢o地平時買漫畫o既商場，當時我見到一個破破爛爛商場，今次再去，變o左潮流集中地，頂樓仲變埋ACG特區，見到佢o的「蛋」同figure舖，都幾追得上o的貨。我有兩秒以為自己去o左秋葉原…..。
早兩日買到孫威軍本新書，講「古代戰地記者」！題材極之新奇有趣！前半段講戰地記者工作同心態都好正，但係都有少少火鳳feel，可能同一班編輯o卦。但係到o左中後段，成件事突然間轉o左奇幻路線~~~~個人覺得有o的浪費o左戰地記者哩個新鮮題材，不過見佢應該係搞緊男主角o既伏線，睇多一期先知佢搞乜。都係希望跟住多番o的戰地果部份，亦都希望佢哩本書賣得好，有機會出番「幻遊記」單行本啦。
今期某本game書有孫威軍專訪呀，好似係gamewave，有興趣搵黎睇啦。
早幾日諗住去睇仆….係魔街，《魔街理髮師》，除o左因為係添布頓fans，最想係睇下同我十幾年前畫果套，同樣係講殺人理髮師o既故事，有冇乜o野雷同之處。不過都係就唔o岩時間。
結果走去睇o左《越空行者》，見到我自己好鍾意用果招「瞬間轉移駕車去撞人」佢用o左三次！好彩條橋我零四年印o左出書。
零四年版本《星流浪族》p.64
睇完沖一介紹http://www.gaforum.org/showthread.php?t=168003 o既討論，哩一之代普遍都覺得漫畫o既環境係差o左，係，比起90年代最高峰係差o左好多。但係我自己覺得咁樣，其實大家又記唔記得80年代，日式漫畫響香港又有幾小眾？
當時同年紀o的人淨係睇打書，想搵多個有睇過下日漫o既同道中人都無呀！同睇打書o的人傾漫畫創作根本完全唔o岩咀形！你同佢講戲劇節奏，佢o地永遠停留響肌肉紋上面……..自己畫開頭幾套作品完全無機會俾人睇。
睇番今日，悲係悲，但係畫套稿出黎，如果似模似樣o既，起碼有人睇有人讚，印出黎仲間唔中有人買添！上網隨時有一百幾十個同道中人一齊有傾有講咁。慘極都仲有個譜丫~~~~~
要我覺得漫畫「沒有明天」，除非去到有一日，報紙檔連一本日本漫畫都無得賣啦。
近兩期都係萬聖節feel~~~~
哩兩年萬聖節響商人大力催谷之下，由十幾年前只有洋人記得o既十月三十一日，變成幾乎係成個十月o既節日。應該仲好有發展潛力。正如聖誕咁，唔係咁多人信果樣o野，普乜鬼o野天同慶丫~~~，大家都只係想搵個借口出街開心下o者。可能再谷多十年，萬聖節都有聖誕咁o既效果。
終於突破o左九期o既正篇，新版去到第十期喇~~~~~！呀！又見番我偶像羅亞教授，三個咁多？仲有爆炸頭狂野版！雙cpu都俾佢諗到，確係勁！軾古斯變o左第一「男」主角添。開始戰爭喇，件事開始玩大喇，再玩大o的啦，我要睇番「電」大人果種程度o既感動呀。
追o左十幾年都仲好好睇，唔該哂！
(0)
