上星期番o左大陸做o野，一連五日。
平時出埠，自己部門最少都有三個人，今次得我一個，仲要做埋其他人o既角色，咁大鑊都係第一次。果幾日其實心情唔多好，因為經驗上o既問題，經常俾人插！第一次自己一個人揹哂件事，顧慮多o左，壓力自然又大o左。不過哩次經驗對我幫助好大，平時工作上面無乜留意o既o野，都要一一面對番哂，技巧上面焗住跨前o左一步。自己諗深一層，自己有o野做得唔夠好，俾人插係應份o既，插完我又學多o左樣o野，何樂而不為？經此一役，而家完全有哂信心應付同一個處境。哩一轉有得食有得玩，有得俾人插，插完又有進步，真係賺哂~~！下次預埋我呀唔該~~~~~！
睇睇哩轉搞咩先。深圳書城，大！不過可惜無時間行，搵日一定要去多次。
跟公司出去做o野，最大好處係“食”一定好，最緊要唔使自己俾錢。
因為幾日心情都麻麻，好少影相。去到最後一日臨收工輕鬆哂，上面係世界之窗，一個同香港廸廸尼一樣，自己絕對無諗過會買票入去o既地方。
做o左攝影十幾年，終於遇到傳說中o既處境。
話說前兩日響荒山野嶺拍o野之際，有位大叔單人匹馬踩住單車埋黎，我仲以為佢係放狗o既行山人士，佢落車行埋黎，叉起條腰，問我o地咩公司。荒山野嶺講哩句對白，即刻明哂！有人想「收坨地」……聽得多，見就第一次。以為會係一班紋身大漢，點知竟然係得一個阿叔….，我o地成班人有六條大漢加兩個靚女加八個婆婆，望住佢一個人企響一個低我o地一級o既地方，佢自己響度囉囉唆唆講o左一堆邊忽邊忽係佢地方，咩電影公司都知規矩呀~~，咩入屋叫人入廟拜神咁。我o地第一時間點佢同導演「商量」，其實當時都已經拍得八八九九，趁佢o地一邊吹水同時，我o地即刻執o野走。結果一毫子無俾佢就閃o左！
我臨上車仲向佢揮手，講「唔該哂，阿叔！」唔係佢走黎搞一搞，我o地仲陪緊個導演撚緊無謂shot！無咁早放飯。我諗佢應該只係附近o的村民，想搵著數o者~~~，下次唔該請多兩個老臨先至黎兇人啦~~~
哩幾日又凍又大風，工作關係偏偏日日都要去海邊。早兩日好大浪，12度之中，為o左兩個可有可無o既shot,搬o左堆器材落山崖下面…..。順便睇o左半日浪，好鬼大風，個個浪都米幾咁高！好有氣勢。見對面個島激起浪花十幾廿呎！如果唔係有班同事在場，好想向住個海大聲嗌~~~~~~~！海浪衝擊造成岸邊一層層白泡，好似海面上有層白雲咁樣，好神奇。
今日天氣好番少少，坐「大飛」去o左個魚排。都唔係第一次去哩種地方，而係第一次響上面食海鮮。拆o左兩隻蟹，確係無得頂！果種嫩滑o既感覺真係……。傳說中o既西貢食海鮮果然係名不虛傳呀~~~~。
同場仲有哩隻狗狗表演碌黎碌去助興。
頭先入o左海洋公園開工，無錯，都係為o左佢萬聖節o的活動。我今日響鬼屋入面逗留o左超過我一生留行鬼屋時間o既總和，仲差o的俾女同事扯爆背包…….因為無迪迪尼文化上o既包袱，佢玩o左大量中式鬼怪o野，老實講，中式真係得人驚過西式好多……….仲要加埋大量o既演員化個鬼咁厚o既妝彈出彈入，辛苦哂~~~~~
同事話，點解唔鬼節搞o者~~~，暑假又多o的人玩！我話，鬼節仲有好多免費「演員」客串添啦~~~中國鬼節應該無乜人敢咁玩法卦。
原本夜晚係去埋迪迪尼，不過佢果邊又玩o野，安排得好有問題，哩樣唔俾果樣又唔俾……。你而家輸緊人成條街，好心唔好再擺款啦~~~
我o地果個年代，多數人細個一定會有過哩兩個夢想，一個係擁有一隻藍色o既機械猫，另外一個無咁「絕對唔可能」，而又有少少遙不可及o既，就係去玩具反狗城一分鐘任拎玩具！尋日有機會見證兩位小朋友夢想成真。
其實一分鐘拎得到o既o野真係唔多，反狗城咁鬼大，行到去想要果樣o野面前都去o左一半時間啦~~o的同事話，咁鬼蠢o架！梗係見o野就掃丫嘛！我話，咁細路係拎自己真係鍾意o既優先o既~~~。見到o的細路拎到總數自己體積三倍咁大o既玩具，自己都有少少興奮。原來咁樣掃一o野，埋單條數都唔係好貴，最後都係三、四千左右。可以自己出錢俾自己實現番個童年夢想都好喎~~~，再唔係搵個朋友交換找數咁仲興奮添！
出o左海做o野，上郵輪。其實都唔係第一次坐哩o的大船坐過夜，細個過澳門，都係坐所謂「大船」，要訓一晚先到，有少少重溫果種感覺…..
對住哩種360度超無敵海景三日，實在有o的悶。好彩第二日上岸，係夏門。不過烈日當空四十度，但感覺上比上次泰國42度辛苦。
(81804.jpg )不過當地有好多古建築睇下都算幾好，可惜係掛住做o野唔係好記得影相….有幾個幾鍾意o既位，用公司部機影完之後，唔記得自己補番相。
諗住做足三日實死得，點知尋晚有半晚空閑，成班同事反而唔知有乜o野搞，半均上床時間竟然係──8點半！好彩我有psp….哩類郵輪旅程都唔係太適合我o地o既年紀，我退o左休好多年o既老豆上個月先響同一隻船，同一個旅程番黎咋~~~~~
正常人賀回歸放三日假，我就開足三日工，仲鬼咁長鐘…..
隻figure又出意外，表皮有泡泡….。已經解決o左，花o左好多時間。罐噴射畢地亦都精盡人亡，你好好安息啦~~~~
頭先用公司部機幫佢影o左o的相，不過光圈就得唔靚，聽日再影，好累…..
(0)
