話說，第一輯最終回，邪惡集團「銀河兄弟」企圖將全人類改造成嘰嘰兵計劃失敗之後，
大幹部A回到已經炸毀o既總部，望住大批損毀o既武器，慨嘆壯志未酬……
哩個係一個人生關口，組織主力人物二幹部骨精、紋身師、戰鬥員黑葵2、怪人火麒麟、滑板女王、怪人整備師沙田油屎仔等各人懷著心事咁離開o左組織。

半年後──旺角西洋菜南街街尾

二幹部骨精因為受唔住上一輯o既打擊，佢離開組織之後，
人生目標亦都有所轉變，佢血液同背囊入面，有o既唔再係熱情，而係一個又一個萌系女figure….
佢決定用女figure建立後宮去麻醉自己。

就o係行到街尾哩一刻，佢遇見一個人，但係，佢內心受傷o既感情叫佢避開哩個人…
「企響度！」
二幹部骨精停步，但係始終無回頭。
正在手推車小販魚蛋檔，改行賣緊魚蛋o既大幹部A用熾熱o既眼神，望住二幹部骨精o既背影。
二幹部骨精：「點解，點解仲要俾我見番你……？」
大幹部A：「你睇你而家似咩？俾你征服o左萌系女figure界又有乜o野意思呀~~~？」
二幹部骨精眼有淚光：「你唔好理我啦~~~~組織o既戰友，個個下場都係咁o架啦！」
大幹部A：「你……你講乜o野？你見過佢o地？」
二幹部骨精：「戰鬥員黑葵2自從上次一戰之後，經常俾人笑佢，話『你估而家仲係玩緊鋤大Dee？而家玩緊２１點呀，你黑葵2唔再係大哂o架喇~~~~~~！』」
大幹部A：「………，咁佢而家點呀？」
二幹部骨精：「佢失意之餘，而家…..以雕刻佛像維生……，你都係面對現實把啦！」
大幹部A：「荒謬！你知唔知！紋身師響國內坐緊監，佢都答應逃獄番黎復興組織呀~~~~~~~~。而且怪人火麒麟仲響深山苦綀緊，下星期佢去日本打敗埋極真流就會歸隊o架喇！」

二幹部骨精：「太天真喇~~~~~~你哩o的所謂o既希望，逃獄、打敗極真流都只不過係妄想黎o者！就算係你一直認為唔會離開o既滑板女王，都因為海鮮敏感，已經好耐無黎開會喇~~~~~~~！」

大幹部A：「……」

就響哩個時候，一隊食環處人員小隊高速逼近，久經慣戰o既大幹部A響哩種落難時刻，唔想無謂o既殺生，唯有選擇「保留戰力」…..
邊走邊對二幹部骨精講：「我唔信你就咁放棄哂我o地o既夢想，你今晚番總部！我帶你去見一個人！」

九龍灣工業區遺跡基地

二幹部骨精重臨故地，一臉感慨…..
大幹部A：「歡迎你番黎“一切邪惡o既起點”。」
響遺跡深處，一部疑似洗衣機o既機器發出警號！
二幹部骨精：「唔通，哩部就係每隔108分鐘就要輸入一堆奇怪數字o既機器？」
大幹部A：「唔係，唔係果部。你睇，入面有咩。」

二幹部骨精從圓形玻璃窗入面，見到一個……..人。

二幹部骨精：「怪人整備師沙田油屎仔？！」
大幹部A：「佢自從第六次將自己轉生做怪人失敗之後，就一直昏迷。但係佢都係無放棄過。」
二幹部骨精：「你又知佢無放棄過？」
大幹部A對小虎眉一揚：「我尋日唔覺意拎高樹瑪利亞幅相行近部機，佢….有反應…..」
二幹部骨精：「o下？」
大幹部A：「我係話，生命反應……..。哩兩日可能會醒添。」
二幹部骨精：「咁又點？得番幾個人又可以搞得乜o野花臣？」

基地入口，一個雄偉身影出現：「就算得幾個人，咁又點呀~~~~只要有拳頭，就等如‧有‧伙‧伴！」
二幹部骨精認識哩個說話o既雄偉男人，哩個人響H界舉足輕重，H系最強七「色」戰隊入面“熊”戰士！

大幹部A：「其實熊戰士一直係我o地組織o既人，上次行動，佢負責卧底o既工作，今次正式回歸銀河兄弟，一齊作戰！」
二幹部骨精：「有o的咁o既事？唔通你打算用H系列征服地球？我對人生有番希望喇！」
熊戰士：「犯法o既o野，我唔會做o既，之不過為o左正義………….」
　　　　「重有一件事，我今朝遇到一個人，佢俾o左哩樣o野我。」

係一具手雕o既──佛像………….
　　　　　　　　　　　　　　　　　　　　(待續…..)