中毒中……久違o既「電腦出事，世界未日」o既感覺。
四日o既「兵役」完結。基本上黎講，我完全當係去旅行，都幾開心。
今次主要係去動物園，諗住係影下o的獅子老虎咁o者，但係估唔到最後可以咁，係一個無圍欄o既近距離，對住哩一班三層樓咁高o既龐然巨物…….由於佢o地好重戒心，我唔可以行得太埋，上面張相係我用個無得ZOOM手機影o既，已經行得好近，不過係表現唔到果下感覺，就係現場果種成班恐龍響身邊行黎行去o既奇異感覺，曾經有一刻我以為眼前o既一切都只不過係CG key出黎o既幻覺….
跟住就係哩隻小白獅，成隻猫仔咁樣，我仲乘機摸下佢個頭仔。
哩碟o野…..本來想放O的佢生前o既圖，不過太樣衰喇，都係放哩一張啦。至於係咩生物，睇o的皮無可能估唔到啦！之後已經響我個肚入面….
另外仲去o左個餐廳，係食自助餐o既，不過特別o既係，我未見過餐廳大間到要派張地圖俾你睇住去拎o野食。大陸真係「地方大」哩一點係無得學。
今年放兩次大假都去唔成旅行，諗住今年次內都唔會有得離港行下。點知淨係哩個月都一連上兩次大陸做o野，今次仲一連去四日添，聽朝就出發。有咩趣聞，番黎再報。
另外，童年夢終於都搬喇，咁大間舖頂到咁耐已經好難得，不過間新舖位幾隱閉，唔知真係唔識摸過去。
點解會搞成咁o架~~~？
便利搞到半價，再送叉燒飯~~~~唔係，係公仔麵……？自從無o左漫周之後，佢曾經擁有香港最權威o既漫畫專欄。雖然我一向好少買雜誌，但係行過7仔都會睇下今期個漫畫版講咩。當時正值本地新一代漫畫發展高峰期，好多個漫畫人o既訪問，都剪存到今日。曾幾何時都暗暗希望過，自己作品都可以響入面佔番少少篇幅。
點知對手出現幾年間，忽然轉哂風格，竟然走低檔路線，由「年輕人潮流雜誌龍頭」，降格做「少年咸書之王」。之後甚至有「少年叫雞指南」o既美譽…………..而家仲搞成咁，究竟係個市場定位出o左問題，定係讀者已經正式嫌棄o左哩個集團果種被稱為「不擇手段」o既編輯手法？
唔知幾時開始，每次過親海，都會借故走去坐一程船。如果由中環過海，一定坐下一層，貪佢睇到浪。
工作o既地方，響中環天星入面有間直播室，曾經有五、六年時間，平均每兩星期會有一日，全日都響碼頭入面工作。自己最鍾意坐響窗邊，望住出面o的船食飯盒。果幾年初夏，五月天，雲，特別靚。如果響直播室無咩做，都會出去影下雲。試過一次由追住舊雲黎影，由天星追到去港內線碼頭。有時見上天台度門無鎖，偷偷走上天台坐下，吹下風，諗下故事。記得有一次約o左班舊同學走上去睇煙花，點知佢o地無工作證，唔俾上。搞o左一輪，上到去，竟然見到大班公司同事響上面，一家大細一齊指住個天~~~~哇~~~~~！回憶總係美麗o既…………….
連續兩日出o左兩本書，都係我追o左十年以上o既。暗黑破壞神24：條友睇完《魔戒》之後又一鬼上身示範…….不過又幾鍾意果一段，有少少佢本身故事「初代」o既感覺。
銃夢LO#9：終於平o左第一輯紀錄，去到第9期，睇個勢，出多9期都未必完到…其實唔係咁鍾意「吸血鬼」哩一段，不過都完o左，希望下回番上軌道啦。
講番自己。連續閉關幾日，有o左突破性發展！劇本穩步移動中。終於行o左一個「小周天」！距離打通全身經脈前進o左一大步。
哩幾日突然「宜會友」，本來放幾日大假諗住清清靜靜寫埋個劇本，點知反而連續幾日都有局。
前兩日有公司同事離職，成班人陪佢去燒雞翼，哩種事對好多人黎講只係好平常o既生活，但係睇番自己，原來從來未試過同公司唔同部門咁多人出去玩過。
其實都係自己有問題，份工做o左超過十年，一直同同事o既關係都好疏離。大家其實對我好好，可能係我成日覺得自己係畫漫畫o既多過屬於賺錢維生o既地方。對份工唔算係十分投入，當然，本份係有交足o既，但就一直緊此而已。好少同班同事開心見誠傾多兩句。最離譜係之前有o的同事個名，我聽o左七、八年，都可以唔記得……..
一直去到近兩年，唔知點解又同班同事熟o左好多，玩得埋o左，可能自己年紀大o左，學識珍惜身邊o的人o卦？
(0)
