好，又返黎喇。
頭幾日係去大阪京都，今次大部份行程都係十年前去過哂，
舊地重遊，感覺上反而好似尋日先去完咁。只係今次唔係拎支菲林長炮，
換o左細佬部咭片機，輕鬆哂~~~~

今次同行o既有聰少同骷髏騎士。
第一晚去o左溫泉酒店，自己年頭先去完北海道浸，感覺上好似無走過一樣，
有種留o左響日本第八日o既奇怪感覺…..

酒店望出去觀景唔錯，但係設備始終係北海道果邊好好多….。
溫泉雖然唔係我喜好，難得係幾個麻甩佬赤條條咁傾下心事哩下最開心！

由於上一次同哩班團友淨係漫畫團，乜o野古蹟都無行過，
跟住二日都係行寺院，本身好鍾意o的超巨型古代木建築，
遇o岩紅葉季節，全日都係紅葉加寺院，天氣又涼涼地感覺好好。

原來有o的寺院另外有夜場，加o左o的燈光效果，
原先擔心會係大陸果種鬼五馬六o既七彩燈光，結果當然係另一種級數，
帶出o左一種「空靈靜」o既感覺，當時我淨係諗到「空靈靜」三個字。
印象最深係一個波平如鏡湖上o既樹打o左燈，水底就好似有另一個宇宙o既幻境，
搞唔清自己究竟身處水面定係水底。感覺好奇妙。
如果唔係有班傻佬開閃燈影相就更好。
現場太暗，我就無影到相，儘量用個心去記住果種感覺，唔知骷髏騎士影唔影到。
之後，聰少求籤仲抽到大吉！轉運喇今次~~~~~~~~！

跟住又係去多一次太秦影畫村，十年前果次撞o岩山田洋次o既寅次郎專題，
佈置o左好多五六十年代o既景，我對果個年代好有興趣，印象好深。
今次去到，成個會場完全唔同哂，變番我最無興趣o既古代日本，加上當日
氣溫急降，我o地幾個都凍到震，都幾無癮~~~~
不過有個位幾有趣，佢地下果層有個甲胄展，樓上果層係特攝展，
兩張相拍埋就咁……..
 

之後返過去東京，補番年頭條數，去o左幾轉秋葉原，原來秋葉原已經
俾maid統治o左喇~~~~~~~~~，每條街有幾間maidcafe，
「服務」已經發展到「膝枕」加「採耳」，maid正式成為o左軟「性」服務行業喇…….
骷髏騎士幾日淨係不停買figure、柯屎、買figure、柯屎、買figure、買figure同柯屎。
最後，戰利品總體積係大過佢自己……..

同場加影骷髏騎士單挑矢吹丈……

跟住去到今次過去o既主題目的，聰少話係全國第二大o既同人活動COMITIA。
雖然話係第二大，但係規模同香港CW差唔多，主要原因我諗係因為
活動主題係純原創作品，無o左龐大Otaku部隊，無cosplay，當然更加無專影
cosplayer 果班無謂人啦。全國純係為去睇漫畫o既人實際上淨係得咁多？
香港CW咁o既規模？都幾無奈呀…..
不過我o地就入o左寶山一樣，執到好o野。

入場人士明顯比較溫文，無Otaku獨有果種令人打冷震o既怪笑聲，
始終入場真係為o左睇漫畫，唔同果班瘋狂fans，無果陣瘋狂冒汗橫衝直撞o既氣氛。
哩個係「文藝青年」同「萌系青年」o既分別o卦？
最感動場面係會場入面間開o左一邊，有十幾間出版社派o左編輯，
直接面對面同拎住原稿入場o既作者洽談合作！或者交流意見！
哇！夢境一樣呀！
出版制度成熟成咁~~~~，好感動呀~~~~~！

成個旅程，最開心都係大家夜晚圍埋一齊傾下心事果段時間，好似以前去宿營咁，
希望下次多番o的人一齊去就更好喇。

去埋哩轉，今年已經超過o左一個月時間唔響香港，拖慢哂o的創作進度。
又啟發o左唔少靈感。
不過出埠運仲未行完，尋日即刻要上大陸開工……..，唔知下個月仲有無得出去呢？