| 今日初一，祝所有創作人──才思敏捷。
講番個旅行。
頭兩日半首先到東京。
重來未試過跟團去日本，感覺極度身不由己。
如果唔係同屋企人去，跟團真係諗過先。
個團係細佬報o既，我後尾先知原來有一日係迪士尼，正！
咁我可以唔去迪士尼，自己閃出去秋葉原啦~~~~~~
點知原來可以揀去迪士尼海洋，咦！未去過果邊喎，
咁唯有閃遲些少啦。
「海洋」果邊玩就無乜特別，係o的景實在好正，
去拍拖真係無得頂~~~~~~
有幾個位直頭覺得係FFIX咁樣添。
最後半日有偷走過去秋葉原，今次破哂紀錄，只係可以停留25分鐘！
唯一收獲係唔覺意睇o左村田蓮爾一個無o野睇o既展覽…..
所有想行o既舖都行唔到！
算啦，今次主題都係諗住同屋企人去北海道o者。
第三日晚終於北上。
好大雪，一落車就變哂雪人，有哂保護色，融入o左雪祭個會場環境…
雖然唔係第一次見雪，但係香港人興奮係正常o既。
果兩日見雪就插、仆、滾、翻、跳、撻………
之後去到聞名已久o既小樽，景色果然係同東京o既鄉下地方好唔同。
都係循例去睇下o的玻璃工藝同音樂盒咁樣，本身對哩類工藝都有興趣，
但係都係鍾意出去影相多o的。
原本好想響運河果邊留到夜晚，係情人節前夕，見有人刻意佈置緊o的
o野，砌o左一o的雪屋仔，入面應該係準備點o的小洋燭，
影出黎效果應該非常正，可惜而家係跟團，未入夜就轉場，
只係響運河果邊停o左一陣就走……..
當晚去溫泉酒店，老實講，我沖o左廿幾年凍水涼，連普通熱水都好少浸，
莫講話溫泉丫。嘩~~漫畫入面成日見果種大浴場呀~~~~~~！
成堆麻甩佬赤條條咁你眼望我眼，果一刻實在好有衝動想───影低佢o者~~~
不過原來哩家o野都幾嘆喎~~~~浸完成個人散哂咁。
熱到要搵o的雪捽落個身先安樂。
最後果晚間酒店o的溫泉仲正，有雪飄落個身果隻，係差o左無猴子陪浸。
我o地都循例研究下女浴場響邊。可惜無功而還……..
好啦，玩完個冰，下個星期又去泰國開工，玩埋個火！
一個月之內感受得齊冰火二重天o既變化。
|
(0)
