十日冬天o既陽光與海灘！
不過我係去做o野。

上次去泰國係十七年前，已經無乜印象喇。
今次響傳聞有鬼o既新機場落機，好鬼大！行極都唔到入境個位。

今次聽講話有旅行局支援，
諗住好食好住啦~~~~
第一晚，住果間唔可以稱為酒店，感覺上似大嶼山渡假屋……
出面係屋村格局，係彭氐兄弟電影o既好場景……..

 
跟住第二朝原來又唔係即刻開工，係同導演去睇景。
第一次咁樣山長水遠去睇景，又唔使正式做o野，又有公司車坐，
每個「景點」落車睇一睇，行個圈就走，
感覺就同上次去北海道跟團差唔多。
唯一擔心o既係今晚住邊…….

果一晚，我終於知道咩係渡假式酒店喇！
勁正！我自己去就無本事住哩o的級數喇，叫做試過都算係咁。
跟住幾日都係住得好好，睇住o的洋人攤響泳池邊晒太陽睇小說。
雖然要做o野，又曝晒，拎住部機走黎走去成身汗，但係心情都好渡假feel~~

有時間行o左一陣街，梗係睇下人o地報攤有冇漫畫啦。
一樣有one piece、鋼鍊、狐忍、漂靈，不過好似遲一期。
仲有o的港產打書，不過我唔多認得係乜o野。
另外，香港禁哂果o的武器──飛鏢、軍刀、電槍、警棍周街有得賣！
我逐樣拎上手玩下，其實我想試下支電槍o架！老闆幫下手啦~~~~~

節目方面，有主持人騎馬，然後我o地徒步用腳去追。
仲要人向後行，走響佢前面….。
坐隻圍欄唔夠一呎高o既漁船出海，但係個浪有兩呎高，
我o地雙手拎住部機拍o野，無手扶住，跌落海我部電話就無o架喇….
跟住坐沙灘四驅車車尾拍o野，係我人向後坐，又無扶手，
每三秒就有一次轆落車o既機會。
拍完我都乘機親自開o左一轉，好爽呀~~~~~

有日請o左幾個演員幫手，係「女」演員。
救命呀~~~！上半身成個日本妹咁樣，
唔出聲真係唔知佢原來下半身係…..
跟住落黎果幾日搞到我出街完全無心情睇女仔。