頭先新聞話，日本遲o的去K場，唱K之外仲多o左樣o野玩，係玩配音！睇住條動畫片段，跟住o的字幕「講K」！仲有得睇番個成果，班宅男腐女肯定日日排隊入去玩。哩條橋實在夠絕！服哂~~~~~。之後肯定會好多cosplayer響k房出入……。
我就對電影配音興趣大o的，成場戲改哂o的對白應該幾有娛樂性。
睇完條片，好想「養貓」呀~~~~想像唔到以後四人連線，每人帶隻貓，八隻生物圍攻一條龍有幾壯觀呀~~~
最近工作好繁重，好多事想坐底寫兩句都無時間。首先，邪惡集團「銀河兄弟」秘密基地秘密移動，成立極東總部，向征服地球跨進o左一大步！堆滿o左邪惡儀器o既混亂狀態…….聽講而家已經整頓好哂，搵日上去開支酒慶祝下先。
之前聽一個成日著涼鞋，腳趾灰灰黑黑，手甲經常剪唔貼兼有黑邊o既人講，話原來佢係有潔癖…………
早幾日去某片場做o野，見到上面哩件「道具」，應該係真飛機o既殘骸，即刻影番幾幅資料。
一直覺得部舊相機唔夠用，無手動對焦影figure好辛苦。而家舊電死埋，更加急住要換。紅假果幾日，我細佬去旅行，老豆老母又去另外一個行程。屋企唯一一部健全o既傻瓜機俾老豆拎去用。細佬就同我講「橫豎你都換機，不如你買部新相機借俾我用啦！」。然後每隔幾日就打個電話sell哩個「概念」一次……
話說響我少年時代，讀緊一個攝影課程，想向老豆拎三千銀買部相機黎用，我細佬極力反對之下，結果之後六年之內我都無相機用，兼且到今時今日，我都覺得當時因此學唔成攝影，係一大遺憾。
佢而家諗得出哩種「我去娶個老婆返黎，但係俾你用先。」o既妙計，又夠膽好意思講得出口o既，都確係幾無得頂~~~！但係更神奇o既係：我早兩日出去旺角買o左部相機，借o左俾佢…….
尋日收到通知，今屆漫畫節「動漫ArtIdol」開始接受報名。
早o係舊年八月，我已經諗到一個人物，打算今年造出黎。尋日見到個通知，諗住第一時間報名，但係原來今屆有限制題材，大會想配合奧運….。我本身對運動類題材一直無興趣，一時間唔敢肯定交得出水準，而且先前想造o既人物又唔造得，所以猶豫o左一日。今朝仲諗緊好唔好暫停一屆，今年專心畫稿？夜晚返黎，o岩o岩開機收到通知，原來已經額滿！即刻鬆o左口氣~~~~
做o左攝影十幾年，終於遇到傳說中o既處境。
話說前兩日響荒山野嶺拍o野之際，有位大叔單人匹馬踩住單車埋黎，我仲以為佢係放狗o既行山人士，佢落車行埋黎，叉起條腰，問我o地咩公司。荒山野嶺講哩句對白，即刻明哂！有人想「收坨地」……聽得多，見就第一次。以為會係一班紋身大漢，點知竟然係得一個阿叔….，我o地成班人有六條大漢加兩個靚女加八個婆婆，望住佢一個人企響一個低我o地一級o既地方，佢自己響度囉囉唆唆講o左一堆邊忽邊忽係佢地方，咩電影公司都知規矩呀~~，咩入屋叫人入廟拜神咁。我o地第一時間點佢同導演「商量」，其實當時都已經拍得八八九九，趁佢o地一邊吹水同時，我o地即刻執o野走。結果一毫子無俾佢就閃o左！
我臨上車仲向佢揮手，講「唔該哂，阿叔！」唔係佢走黎搞一搞，我o地仲陪緊個導演撚緊無謂shot！無咁早放飯。我諗佢應該只係附近o的村民，想搵著數o者~~~，下次唔該請多兩個老臨先至黎兇人啦~~~
(0)
