個figure今日最後一焗，由於焗爐狹小，焗o既時候又唔可以碰到爐身任何地方，所以每次入爐都好緊張，好小心安排擺放o既位置。今次都係精心安排，但係就無預算到部份組織遇熱變軟，支撐唔到，結果我之前精心打磨到光滑個屁股跌坐響爐身，就咁燒焦~~~~~~~~~
即刻要做手術，將燒焦o既部份鋸走，再補泥再焗，之後再打磨一次。原先預計今日可以完全成形，稍作打磨就可以放o的相上黎，點先個屁股要打磨到而家都未完全復原……..
星期日上銀河少年間廠，仲講緊笑話火燭點算，點先尋日就真係燒o左……..隔籬個單位。
個figure身同腳o既部份要先打磨，然後再加小部件。本來可簡單磨下就算，點知集打磨強迫症同小腿痴漢於一身o既我，對腳「捽」o左…..五日…..o的沙紙都用哂，都應該收手喇~~~~仲差雙臂同腳掌就完成喇！今日搞o左少少，振作呀~~~~~~！
今日番工，又湊夠四個人「開大片」。不過自從佢o地近日開始集體信奉o左「老金主義」之後，已經無o左果種狩獵o既感覺，無哂組織同戰略，同佢o地講點樣分工、用閃彈落陷阱咁樣，回應係「使乜丫~~~把刀幾萬攻，兩下就死啦~~~」大佬！一個老金斬十刀就死，兩個老金連線斬五刀就死，三個…….咁唔使連線玩啦~~~~！只係單純咁屠殺~~~~，雖然我都幾鍾意屠殺，只係無o左一班人上山去玩o既感覺。響公司打機開始變得無癮……..佢o地對隻game o既熱情都好快變得急轉直下。始終玩「免費game」o既人都唔多會珍惜尊重欣賞o的不勞而獲o既o野。只係響度快速「消耗」人o地o的心血，哩個可能都係香港發展唔到創作事業o既其中一個原因。其實我唔太介意人o地老金，只係搞到成件事變得沒趣，就真係無乜意思o者~~~好彩屋企附近仲有一大班真正o既同好，以後番工當儲o野就算喇。
因為好難搵到三個HR6 o既人一齊，尋日終於可以響公司打到「霸龍」，霸弓順利到手…..(終於)，遲過其他人成個月都有。為o左開到霸龍，又要打多次大蟹，守城果版。可以響城上對住個口亂咁射確係爽！
睇o左《惡童》，當然係因為太迷o的場景，只不過真係唔知佢想點……，本來開頭將o的街童描寫到超人咁樣，係幾有趣，不過個主線慢慢好似偏o左去o的黑幫大叔果邊，o的大叔個性又唔多吸引。原本預期子供之城果場會搞得熱鬧一o的，總之就失望啦~~~
figure進度：頭、身、大腿、兵器完成。星期六前要交相，我想起碼完成雙手再影相。進度相當順利！
如果大家鍾意o既漫畫類型，同我差唔多o既話，咁見到圖中哩件道具，應該都估到今次我整乜o野角色。
今日進度係，打磨完塊面，發覺手上o既畢地已經開始變硬，唔係幾用得，又要出去買。跟住骨格同動作都搞掂，又整緊哩件道具，同埋舖緊o的「肉」上面。大致上個外型雛型已經有響度喇。不過有把重要o既「挫」唔見o左，可能又要出去買，節奏有少少被打亂……
我屋村個「獵人團」今日變o左小貓俱樂部…….，不過打o左一場已經有四粒古龍血，多過我哩幾個月加埋o既總數…..
(0)
