頭先同大幹部入去行o左個圈，其實都已經幾悶，但係今日先發現入面竟然有劍賣喎~~~近兩年經常夢見自己買劍，無十次都有八次，唔知點解會有咁強烈咁無聊o既潛藏慾念…..不過o的款唔太鍾意又嫌貴o左少少，始終經歷過同骷髏騎士響北京揀過o的百幾蚊o既，好難搵得番會覺得抵o既。
鐵人兄弟winson見我上次鍾意個馬來西亞插畫家，今日特別拎o左一本佢o地合作o既書俾我，大感動呀~~~~~以後有咩上刀山落油鑊即管吩咐啦！
原本今日係「遇到同事」最高風險o既一日，因為我唔多鍾意俾公司同事知我出面搞咁多o野。到離場前都撞唔到一個，點知出到門口即刻撞正…..無呀！我入去玩o者………
今期one piece有一個笑爆位，加一個令我發出叫聲：「啊~~~~~~~~~~~~~~~~~~~~~~~~~~~~~~~~~~！」(維持兩秒)，o既情節，索柏….光之巨人！？不禁想講一句：「做得好！」。
眼鏡臂徹底鬆哂，螺絲滑哂牙，成日想跌想趺咁，又要使錢……..都唔緊要，要再揀個眼鏡又要再適應先麻煩。
尋日好晏先入去，但係都撞番小雷同張樂興。買o左小雷早前出果本畫集，睇番好多最鍾意佢02年o既彩稿，感覺就好似番o左去02年廣州冬日漫畫展咁樣，果一個對國內漫畫發展最有憧景o既時候…..(遠目)長棍幅展出插圖哩日先掛上去會場，係成人版小雲…..o的男女觀眾都睇得幾開心。原本都幾想買佢本畫集，但係$180，縮o左一縮….跟住睇o左一本香港無得賣o既馬來西亞插畫家o既作品集，哇！嚇得我丫！雖然係跟寺田克也風格，但係加上o左自己o既機械特色，效果好好！我都要狂操番彩稿先得喇。另外買o左鵬哥本《密殺戰群#2》，最鍾意都係封底幅插圖。
夜晚成班銀河兄弟同骷髏騎士預祝生日。好耐無見滑版女王喇~~~~~
今日怕人多，唔會入場喇，聽日再報告啦。
好！今日第一日以陪跑一族o既心態正式展出。一直留意觀眾o的反應都幾好，咁細隻公仔，大家都肯彎底身睇下，有o的仲跪底影相，真係有o的唔好意思…下次set番高o的。
上面張相係雜誌無揀出黎登，而我自己最鍾意o既一張。同07月18日貼上黎果張係同一角度，但係拍攝技巧同燈光手法都唔同。
終於買到孫威軍版漫畫無間道。初售時我唔知出o左，舊年聽講有得補購，但係我無去漫畫節。一直對劉偉強o的導演技好有保留，論講故事o既技巧節奏，孫威軍個版本高過電影版，唔係話偏幫漫畫人，而係確實好精彩。但係咁出色o既作品點解會淪落響補購區，賣o左幾年都仲有貨？好o野係唔會人人知o架！哩o的就係香港o既特色囉！
自從漫天星火之後，幾年無去過漫畫節。本來今年都無乜例外，結果因為参與o左入面figure展部份，所以今日入o左去setup。遇o左會撞到熟人，之前睇參加名單有林祥棍，點知原來佢甩o左底…..，未入到會場，反而撞到一個我本來以為無機會再見到o既鄺志傑！原來係佢阿哥有份參展。佢成個大隻o左，型仔到我認佢唔到…..
入到會場，講起都失禮，第一次参與figure展，連布都唔識拎入去，睇住其他人好熟練咁拎o的工具出黎清潔個展箱，又貼相又貼海報。我就咁得隻公仔，仲要係──全場最細果一隻……..個箱又鬼死咁大，個公仔好似粒豆咁……
同場仲有香港第一代同人漫畫家手塜之生，第一次同佢交談，估唔到會響figure場合。更估唔到佢原來一直有留意我網站，知道有我哩個後輩。感動！
睇埋浦沢直樹版《布魯圖》#2，兩個字：高‧超！
除o左用AI隱喻人性寫得出色之外，今集特別欣賞果場側寫o既決鬥。同埋機械人之間交換晶片同連線通訊、立體重播兇案現場查案之顃小設計。一路欣賞佢高超講故事技巧一路學到o野，簡直係一流享受！！
記得舊年差唔多同一時間，同一眾銀河兄弟響日本手塚紀念館有幸睇過原稿，震撼力果然大過印刷品幾倍。諗o左一年都唔明點解，到o左今日終於…..一樣係唔明…..過兩日買埋第三集先。
為o左興祝無記版本「FAIZ」男主角變身做怪人，我都特別將S.I.C中至愛O既「FAIZ」變番怪人形態擺番幾日。始終「555」係平成系幪超之中，我覺得寫得最好o既一套，主要係角色心理矛盾夠哂複雜，又有幪超史上最多角發展o既愛情線！o的女角又係史上最靚，開創o左靚人主導o既風氣，一直影響到最新果一套《Kabuto》連俾怪人襲擊果o的「老臨」女角都要係靚女…..《Kabuto》暫時睇都係主打娛樂性，成功o既搞笑場面特別多，而且真係好笑！角色幾吸引，男主角做作得黎又覺得真係幾型，第二男角傻仔之餘又「做到o的o野」。o的女角又分哂類形攻擊唔同需要o既市場。o的迷鋪得幾吸引，而家集數去到一半，似乎開始有大鑊發生，都幾期待佢下半部點寫，希望唔會爛尾啦！
近兩年覺得自己懶得好緊要！咦！？唔係一路有畫稿有造公仔O架咩！？唔係講哩方面，係成個人生態度都無咁認真，少o左以前事事「扯到盡」果種戰意。一個例子係發現自己講o野成日都未組織完就講o左出黎，尤其是上廠開會，好多時完全表達唔到個意思，唔係組織唔到，而係懶到唔想組織好先講…..可能係成班朋友響度，個人難得放鬆得到o卦？總之就搞到成日唔係好知自己講緊乜！同老總傾古仔又輕易咁妥協，「你話點改就點改啦~~~~」咁佢o的提議又真係幾好o既……
工作上又多o左o的得過且過o既心態…..無再同班「大」o既應酬咁多，哩方面都滑滑o地牙……
以前好多o野，少少唔滿意都唔會俾佢發生，好似哩個版，以前o既我一定要完全重新設計自己風格，起碼都改下隻色丫！最少上面版頂幅圖一定要自己畫o既，而家就好奇怪，覺得喔幅圖「都幾好丫~~~~」！「就咁算啦~~~~~~」「唔好煩喇~~~」！好多時覺得對方唔o岩，我都無心同人爭辯，經常有「你誤解我係你o既問題，我無責任花心神向你解釋咁多o野！」o既心態。搞咩呀我！？唔通哩o的就係「人到中年」o既徵兆！！！？無理由丫！今年先得果「17歲」！
(0)
