今年係同人活動十周年，正好今次CW係史上最龐大同人活動，據稱參加組織超過二千！要分兩個場館去容納。而入場人次未見公佈，但係現場所見果個「經典三層樓立體蛇餅陣」，過一萬都不足為奇。另外官方雖然無定明大會主題，不過我睇民間主題肯定係“涼宮春日”啦~~~~~~~~
一如以往都係入去坐下探下人咁，不過就另外撞到o的預料之外o既…同事…..，唔緊要啦，我都係遊客黎o者。
今次有兩件特別事，一係朋友本“閒書”三個半鐘之內賣哂一百本！成功登上“閒書大亨”o既寶座。二係自己諗通o左一個問題，行均全場，其實都係咁，一樣係無乜原創作品。不過都唔緊要喇，畫乜都好，改編fansart又好，bl又好，H書又好，齋插圖又好，畫乜都算，只要唔係“唔畫”就已經係好事，就算對香港漫畫o既未來幫助可能唔係咁大，唔畫先係真正o既無幫助。要畫稿就會大量咁睇書，起碼都keep住個市場運作….只要仲有夢想，都仲係作戰o既伙伴呀~~~~~！
終於到o左今日…….，其實我唔提起，仲有冇人會記得十年前就係今日，有壇咁o野？
話說1995年12月，有個傻仔構思o左個活動，但係又船頭驚鬼船尾驚賊，搵多幾個朋友一齊壯膽，原因係「唔好意思打電話聯絡o的陌生女性漫畫組織」。跟住落黎就係一大堆聞所未聞o既難題，其中大部份係關於個場地。原來想搵一個負擔得起，又就腳，又可以做買賣o既場地係咁鬼難。跟住又要驗書，又要註冊，又由於重來無人參加過同類形活動，又要搵個地方約哂成百人開次會交代詳情，最正果一下係：有o的茂利見你成件事由唔可能，搞到後黎有聲有色，先至走埋黎話要加埋佢個名一齊搞….吓？我連自己個名都諗住唔出喎~~~~！
成個活動，我個人主觀意願係希望推廣自主漫畫創作文化，結果係點大家有目共睹，就係──失敗o左。長遠黎講係成功推廣o左cosplay文化，間接成就o左過百對痴男怨女……
話哂係花o左我大半年青春，兼且使o左我萬幾二萬銀，搞到自己身體感情人生前途都元氣大傷o既大型祭典，到時到候點都要悼念番下o既。
話時話，圖中哩班人之中，仲有幾多個仲有畫緊漫畫呢可？
尋日上人間焗爐開會，雖然大統領黎唔到，但係原來隻飛空艇已經開o左自動導航系統，進入無人駕駛狀態一樣得。幾條友自動坐埋就傾番古仔，困擾o左我兩個星期果幾條混亂不堪o既戲劇線就咁梳番靚仔哂！唔該哂幾位兄弟！
買o左鄭建和《火龍》第二期，感覺上無第一期咁有心思，有少少落入公式o既傾向….，不過畫面就再前進o左。
今年熱得特別早，本來早兩個月已經想游水，但係一時又要搞展覽，一時又掛住寫下劇本，一陣又連日暴雨，同chung大人約極都唔o岩時間。諸多藉口咁又去唔成，如結果個夏天都過o左大半，今日先死去下水。長時間無運動，游o左粒幾鐘已經收哂皮….咁順便晒下個心口都好o既。
之前搵番收藏好耐o既《布魯圖》o既原版，手塚o既《小飛俠》地上最強機械人篇出黎睇，原本只係出幾頁o既人物，都俾佢改到出幾回，第三期仲玩到機械人靈魂轉移黎突出個機械人人性一面。真係咁都俾佢諗到，哩o的先係二次創作o既示範作呀~~~~香港o的fansart同人誌唔好同再濫用「二次創作」哩個稱號喇~~~~~
早兩日開會，有幸一睹上下華盛敦老師新作「涼宮春日」本！上下華盛敦老師作品一向有保證，作為「多功能」刊物，今次哩本書我可以保証能夠「屢建奇功」！如果拎去日本賣，應該可以有驚人o既成績。新一代o既“閒”書大亨即將誕生喇！恭喜哂熊…..上下華盛敦老師~~~~~~~~大家如果年滿18歲，留意8月27日o既CW啦！
舊年哩幾日，我就係響日本行緊同人展…希望出年哩個時候可以見到上下華盛敦老師響日本o既同人展賣“閒”書啦！
九月一日起，大陸電視黃金時間唔再俾播外國動畫…..
原因有兩個，官方話為保障內地動畫權益，民間話係為o左淡化日本文化滲透。唔理佢邊個原因都好，都明知國內同胞動畫最大片源係老翻市場，禁唔禁根本係多此一舉。需知道動漫文化對於年青人已經係生活必須品，對某o的人黎講甚至緊要過食飯識女仔，靠國內嚴重低收視國產動畫可唔可能滿足哩班猛獸？
都唔明白偉大文明祖國領導人，點會容許下面有人提出咁自欺欺人o既想法…..應該撥款落香港搵o的創作人上去一齊提升祖國動畫水準至係上策呀~~~~~~~~~
早兩日走去睇《魔盜王》第二集，本來都係為o左睇《one piece》果種半魚人同海王類，哩方面都不負所望，仲加埋有場玩埋二刀流添。不過就…..根本就應該叫做《魔盜王2上集》囉！睇到最尾，係無一件事係有解決到…..感覺就似睇o左半套戲就俾人趕番出黎咁樣……
不過節奏同笑位都有水準保證，都學到o的o野o既。另外最近仲有留意o既梗係《死亡筆記》啦，不過就，日本片始終好有戒心。加上哩套要改篇又好有難度，再加上段片頭又唔太吸引，都係睇下口碑先囉~~~~~
(0)
