未，未係中秋~~~~~係早兩日o既工作部份，將一個幾乎全部遷出o既屋村，搞到好似好多人住，跟住仲要搞到佢有節日氣氛。近廿年無點過哩款經典紙燈籠喇！果兩座樓成晚得幾個住客路過，又無電視聲，望入o的「吉屋」裡面，又有床又有櫃，但係鋪哂麈，鬼死咁好「氣氛」…….
跟住半夜走o左去海灘搞第二場戲。哇！六年無試過夜晚行沙灘，好爽呀~~~~~如果唔係拎住堆器材o既話……..不過班同事就興高采烈走去買定啤酒氣水，坐住駕麵包車入沙灘果陣即刻變o左旅行feel~~~,可惜無乜女同事一齊黎。入到海灘，set好o的燈，一開！全場情侶即時雞飛狗走，場面何其壯觀……..，唔好意思，打搞哂~~~~
唔覺意搵到幾個公司同事o的blog，寫o左一o的工作同自身o既事，本身同佢o地唔係好熟，基本上我響公司係好低調，唔容易同人傾得埋。突然間覺得好似了解佢o地多o左，感覺上好似好熟絡。有次響公司碰到其中一個，好似見到老友咁望住佢，佢又望一望我，我突然間醒起哩種熟絡只係單向關係，就好似暗戀咁樣，我即刻「縮」番個眼神….
自己響公司一向少出聲，好少講自己o既事，知道我畫開漫畫o既少之又少，睇過我o的書o既更加一隻手數得哂。唔知有無邊個公司同事發現到哩度，搞到響公司見到我果陣會有「單向o既熟絡」？有o既唔該通知聲吖~~~~~~~
又或者，睇緊哩個blog o既你，根本都唔知我就係你公司果個唔係點出聲o既四眼仔？
旺角信和，曾幾何時係一代漫畫迷出旺角必到o既重點節目，果個年代約人，九成都係「信和門口等啦~~~！」。自從「聖地」慘變四仔「性地」之後，近幾年出旺角，除o左借廁所之外，連上去行個圈都無興趣。
後來聽講個場掃過一o野，但係已經對個場絕望o既我，都係行番皆旺啦！果日同聰少上去兜o左個圈，咦！得o左喎~~~~~~全場變番ACG figure，仲多o左幾間舊年響日本興起果種出租箱寄賣舖，都幾多o野睇。後尾自己經過上去行下，又見到有朋友開o左間舖，賣下o的動漫雜貨。哩度終於變番個「人」行o既地方，以後可以約番響信和門口等喇。
頭先上o左間拳館做o野，見到個沙包又忍唔住同佢玩番兩手。雖然一向少運動，不過有個特性係好易操得番起，上兩星期游o左兩次水，已經成個人都輕盈o左。對住個沙包，試下自己戰鬥力去到邊，比較有信心o既中、上路側踢都仲保持到力度，不過腳膝撞欠準確度。上身方面，掌力反而有進步，肘撞欠力度，腰力有改善o既必要……成班同事睇住哂，無謂出醜，不如收手。
睇埋gunBuster2最終回，好熱血呀~~~~~~~~~~~~~~自己唔算迷第一集，唔係沙兄介紹都唔會留意第二輯，不過咁多年之後有一個回應，感覺好有趣！其實我都當佢係另一套獨立作品咁睇，主要係欣賞佢美術果一邊，好有啟發性，後來女主角竟然搵到第一代o既戰鬥服！不過同佢實在太過唔夾喇。搞笑效果太高喇。
但係估唔到最尾果一下，竟然係包得番第一輯個尾，終於明白莉莉點解要阻止地球質量攻擊！唔知點解睇到最後哩個位，o的淚水係咁流出黎…….究竟點解可以有咁o既效果？？？點解會咁感動o架？有冇人可以講我知呀~~~~~~~？
熊人老師交o左支捧俾我。
－ 目前卓面的圖案是？麼界戰記2 o既圖，不過內容反而係魔1 o既三大主角，幅圖條link已經無o左，俾唔到你睇添。
－ OS為？Windows XP
－ 這台是你的個人電腦？還是公司或家人共用的電腦？個人的
－ 這張卓布是什麼？從o那裡取得的？http://disgaea.jp/2/index.html不過搵唔番我用果幅…..
－ 更換卓布的頻率高o馬？好飄忽喎~~~有時幾日，有時幾年……
－ 卓面上有幾多個ICON？16個
－ 一堆file和捷徑放得亂七八糟的卓面，你看得下去o馬？搞到咁，我都無辦法o架~~~~~
－ 有沒有什麼堅持點？用得就算啦。
－ 有為了填這次接力, 還特地整理一下卓面？無
－ 最後請再傳給5個「我想看看他的卓面」的人。我諗除o左已經玩過o既朋友，其他我有興趣果o的人都應該唔會睇到哩度，都係算把啦！
前晚發o左個夢，一向好少會記得到夢境，不過今次可能因為係好似成套戲咁樣，所以印象深o的。
開頭都係果o的常見o既傳染性喪屍故事，人類已經去到劣勢，不過慢慢o的喪屍又唔係人咁樣，好奇怪。成套o野有哂分鏡，連菲林顏色都係特別調整過咁仲有少少菲林粗微粒。好有大片感覺。不過印象最深刻o既唔係哩部份，係後期，人顃已經匿哂入個基地度住，我見到有一場係有一班人討論緊以後點算，哩班人o既外型，就好似我o地熟識o既「正義聯盟」，不過係年老版o既。就響佢o地討論o既時候，入侵者出現！係一個滾動o既大圓球類(唔係喪屍咩？)，武器係幾個流星鎚，高速攻向人群，一個形似閃電俠o既阿叔挺身以快速手法連環抵擋流星鎚！鐵球伸出有尖刺o既觸手，刺向另一個形似蝙蝠俠o既阿伯，鐵球講o左句英語對白：「you got this~~~」刺中蝙蝠阿伯！佢就咁就….變番年輕……..
(0)
